新手五迷入場須知 – Mayday 2019 Just Rock It!!! 藍|BLUE

就快又嚟到香港五迷最期待嘅五月之約啦 ♥️ 今年用番Just Rock It!!!做主題!想當年第一場Just Rock It就係由香港開始巡迴(2011),距離而家已經係 8 年啦~時間真係過得好快!今年演唱會將會喺 5 月 3 至 5 號同 10 至 12 號喺迪士尼舉行!唔知五迷們買到飛未呢?每年例牌佢地會問一句:「有沒有人是第一次來看五月天?」如果你真係第一次去睇,不妨未去之前一齊睇下有咩演唱會小貼士!

點解係「藍」?

今年係五月天藍色三部曲嘅20週年,所謂藍色三部曲,即係《第一張創作專輯》、《愛情萬歲》同《人生海海》呢三張專輯。由於頭三張專輯封面都係以藍色為主,所以被人稱為「藍色三部曲」。官方以「回歸搖滾初心」宣佈大阪同香港演唱會資料,相信好大機會會唱番呢三張專輯嘅歌,大家記住要溫定書呀!

「雨男」傳說

上年喺迪士尼應驗咗阿信嘅「雨男」傳說,一邊睇演唱會一邊落雨⋯⋯雖然大家對五月天嘅愛風雨不改,但嚟得迪士尼緊係要做足準備!上年官方派咗雨嬲,今年雖然未知天氣,但如果你自己有可以偱環再用嘅雨嬲/生得高/會唔捨得用官方派嘅雨嬲/環保人士,十分建議你自備雨嬲!為咗避免會阻擋到其他人嘅視線,最好就唔好用遮~

購買官方演唱會精品

去開五月天演唱會嘅五迷都知,近幾年官方螢光棒都會隨住舞台效果轉色。因於今年用番Just Rock It!!!做主題,如果買非官方嘅螢光棒/舊嘅官方螢光棒都未必做到好似今年官方螢光棒嘅效果。想投入五月天演唱會啲,十分建議你買官方螢光棒!而如果係買咗企位想企前小小又想買演唱會精品嘅朋友仔就要預早少少到啦!

五迷動作速成班

想投入五月天嘅演唱會,必定要留意以下幾個動作:

1. 識唱可以一齊唱:同其他演唱會唔同,五月天嘅演唱會令人投入之處,係大家會一齊唱五月天嘅歌。

2. 唱「知足」時開手機電筒功能:「知足」呢首歌中有一句「一閃一閃亮晶晶, 滿天都是小星星」,大家都會用手機電筒去做星夜效果。

3. 唱「離開地球表面」時一齊跳:每當唱到「Jump」時,大家記住一齊跳!

4. 唱「笑忘歌」時同隔離嘅人拖手:即使唔識都唔洗怕醜架,五迷大家庭歡迎你!

5. 玩人浪:每到完場時,香港五迷指定動作一定係做住人浪嗌Encore,到時記住跟住人浪嚟嘅方向一齊玩!

圖片來源:五月天 Mayday Facebook

延伸閱讀:迪士尼推出新角色~可愛的うさピヨ蟻俠&黃蜂女出動!香港迪士尼Marvel第二擊

Comments

Siu Pin
Siu Pin

no cat no life

©2017 SISGUIDE LIMITED